ദോഹ: മിഡിൽ ഈസ്റ്റിൽ വർദ്ധിച്ചുവരുന്ന സംഘർഷങ്ങളിൽ ആശങ്ക രേഖപ്പെടുത്തി ഖത്തർ. അയൽരാജ്യങ്ങളെ ലക്ഷ്യമിട്ടുള്ള ഇറാന്റെ ആക്രമണങ്ങൾ ആർക്കും ഗുണകരമാകില്ലെന്ന് ഖത്തർ വിദേശകാര്യ സഹമന്ത്രി മുഹമ്മദ് ബിൻ അബ്ദുൽ അസീസ് അൽ ഖുലൈഫി പറഞ്ഞു. അൽ ജസീറയ്ക്ക് നൽകിയ പ്രത്യേക അഭിമുഖത്തിലാണ് അദ്ദേഹം രാജ്യത്തിന്റെ നിലപാട് വ്യക്തമാക്കിയത്.ഇറാന്റെയും പാശ്ചാത്യ രാജ്യങ്ങളുടെയും ഇടയിൽ ഇതുവരെ മധ്യസ്ഥത വഹിച്ചിരുന്ന ഖത്തറിനും ഒമാനും നേരെ ആക്രമണങ്ങൾ നടക്കുന്നത് ദൗർഭാഗ്യകരമാണ്. തങ്ങൾക്കുനേരെ ആക്രമണം തുടരുന്ന സാഹചര്യത്തിൽ മധ്യസ്ഥ ചർച്ചകളുമായി മുന്നോട്ട് പോകാൻ ഖത്തറിന് സാധിക്കില്ലെന്ന് അദ്ദേഹം വ്യക്തമാക്കി. ഇത് ഇറാൻ മനസ്സിലാക്കണമെന്നും അദ്ദേഹം കൂട്ടിച്ചേർത്തു.ഖത്തറിന് നേരെയുണ്ടായ പ്രകോപനരഹിതമായ ആക്രമണങ്ങളെ ശക്തമായ ഭാഷയിൽ അപലപിക്കുന്നു. രാജ്യത്തിന്റെ പരമാധികാരം സംരക്ഷിക്കാൻ ആവശ്യമായ എല്ലാ നിയമപരമായ നടപടികളും സ്വീകരിക്കും.ഗൾഫ് മേഖലയിലെ സുരക്ഷ ആഗോള സുസ്ഥിരതയുമായി ബന്ധപ്പെട്ടിരിക്കുന്നു. ഹോർമുസ് കടലിടുക്ക് വഴിയുള്ള ഊർജ്ജ വിതരണ ശൃംഖല തടസ്സപ്പെടുന്നത് ആഗോള സാമ്പത്തിക പ്രതിസന്ധിക്ക് കാരണമാകും.സൈനിക നടപടികൾ അവസാനിപ്പിച്ച് ഇറാനും അമേരിക്കയും ചർച്ചാ മേശയിലേക്ക് മടങ്ങണം. സമാധാനപരമായ മാർഗ്ഗങ്ങളിലൂടെ മാത്രമേ പ്രശ്നപരിഹാരം സാധ്യമാകൂ എന്ന് അദ്ദേഹം ഓർമ്മിപ്പിച്ചു.അയൽരാജ്യങ്ങൾ ഇറാന്റെ ശത്രുക്കളല്ലെന്ന സന്ദേശം ഖത്തർ പ്രധാനമന്ത്രി ഷെയ്ഖ് മുഹമ്മദ് ബിൻ അബ്ദുൽറഹ്മാൻ ബിൻ ജാസിം അൽ ഥാനി കഴിഞ്ഞ ദിവസം ടെഹ്‌റാനുമായുള്ള ടെലിഫോൺ സംഭാഷണത്തിൽ അറിയിച്ചിരുന്നു. അതോടൊപ്പം തന്നെ, സംഘർഷം അവസാനിപ്പിക്കാൻ അമേരിക്കൻ പ്രസിഡന്റ് ഡൊണാൾഡ് ട്രംപുമായും ഖത്തർ ആശയവിനിമയം നടത്തുന്നുണ്ടെന്ന് അൽ ഖുലൈഫി പറഞ്ഞു.
